ବେଆଇନ ଗୋ ଚାଲାଣକୁ ନେଇ ଅସୁରାଳିରେ ଉତେଜନା

ଭଦ୍ରକ, : ବେଆଇନ ଗୋରୁ ଚାଲାଣକୁ ନେଇ ଭଦ୍ରକ ଜିଲ୍ଲାରେ ଦୀର୍ଘଦିନ ଧରି କୁହୁଳୁଥିବା ଅସନ୍ତୋଷ ଶନିବାର ରାତିରେ ଉଗ୍ରରୂପ ନେଇଛି । ଧାମନଗର ବ୍ଲକର ଅସୁରାଳି ଠାରେ ଉତ୍ୟକ୍ତ ଲୋକେ ରାଜ୍ୟ ବାହାରକୁ ଚାଲାଣ ହେଉଥିବା ସାତୋଟି ଗୋରୁ ଗାଡ଼ିକୁ ଅଟକାଇ ଭାଙ୍ଗିରୁଜି ଦେଇଥିବା ବେଳେ ଗୋଟିଏ ଗାଡ଼ିକୁ ଜାଳି ଦେଇଥିବା ଜଣାଯାଇଛି । ଗାଡ଼ି ମଧ୍ୟରୁ ୧୮୦ରୁ ଅଧିକ ଗୋରୁକୁ ଫିଟାଇ ଦିଆଯାଇଥିବା ବେଳେ ଦୟନୀୟ ଭାବେ ବନ୍ଧା ହୋଇଥିବା ଦୁଇଟି ଗାଈଙ୍କର ମୃତ୍ୟୁ ଘଟିଛି । ୧୫ଟି ଗାଈର ଅବସ୍ଥା ଗୁରୁତର ରହିଛି । ଏହି ଘଟଣାକୁ କେନ୍ଦ୍ର କରି ଅସୁରାଳି ବଜାରରେ ଦୀର୍ଘ ସମୟ ଧରି ଉତ୍ତେଜନା ଲାଗି ରହିଥିବା ସ୍ଥଳେ ଉତ୍ୟକ୍ତ ଲୋକେ ଭଦ୍ରକ-ଆଖଣ୍ଡଳମଣୀ ରାଜ୍ୟ ରାଜପଥର ବେଆଇନ ଗୋ ଚାଲାଣକୁ ବନ୍ଦ କରିବା ଦାବି ନେଇ ରାସ୍ତାରୋକ କରିଥିଲେ । ଭଦ୍ରକ ଜିଲ୍ଲା ଧୂଷୁରୀ ଥାନା ପନ୍ଦରବାଟିଆ ଓ ପାୟାସାହି ଅଂଚଳରୁ ବର୍ଷ ବର୍ଷ ଧରି ବେଆଇନ ଭାବେ ବାହାର ରାଜ୍ୟକୁ ଚାଲାଣ ହେଉଛି । ଏହାକୁ ନେଇ ସାଧାରଣରେ ଅସନ୍ତୋଷ ଲାଗି ରହିଛି । ଗତ ଗୁରୁବାର ଦିନ ଚୋରାରେ ବାହାରକୁ ଏକ ପିକ୍ଅପରେ ୬ଟି ଷଣ୍ଢକୁ ଚାଲାଣ କରାଯାଉଥିବା ବେଳେ ଅସୁରାଳି ଠାରେ ସ୍ଥାନୀୟ ଲୋକେ ଏହାକୁ ଧରି ଧୂଷୁରୀ ପୋଲିସର ଜିମା ଦେଇଥିଲେ । ଏହାକୁ ନେଇ ଚାପା ଅସନ୍ତୋଷ ଲାଗି ରହିଥିବା ବେଳେ ଗତକାଲି ରାତି ପ୍ରାୟ ୧.୩୦ ସମୟରେ ସାତୋଟି ପିକଅପ ଭ୍ୟାନରେ ଗୋରୁ ଚାଲାଣ ହେଉଥିବା ଖବର ପାଇ ଭଦ୍ରକ-ଆରଡ଼ି ମୁଖ୍ୟ ରାସ୍ତାର ଅସୁରାଳି ବଜାର ଉପରେ କିଛି ଲୋକ ଏହାକୁ ଅଟକ ରଖିଥଲେ । ଗୋଟିଏ ପିକଅପ ଭ୍ୟାନରେ ଅତ୍ୟନ୍ତ ଦୟନୀୟ ସ୍ଥିତିରେ ୩୦ରୁ ୩୫ ଟି ଗୋରୁଙ୍କୁ ତଳ ଉପର କରି ଝୁଲାଇ ବାନ୍ଧି ନିଆଯାଉଥିବା ବେଳେ ଉତ୍ୟକ୍ତ ଲୋକେ ଗାଡ଼ି ମଧ୍ୟରୁ ଏମାନଙ୍କୁ ଉଦ୍ଧାର କରି ଛାଡ଼ି ଦେଇଥିଲେ । ଗାଡ଼ିକୁ ଲୋକେ ଅଟକାଇ ଦେବାରୁ ଡ଼୍ରାଇଭର ଓ ସହଯୋଗୀ ମାନେ ଘଟଣା ସ୍ଥଳରୁ ଖସି ଯାଇଥିଲେ । ଚାଲାଣ ବେଳେ ଉଦ୍ଧାର ଗାଈ ଗୋରୁ ମଧ୍ୟରୁ ଦୁଇଟିର ମୃତ୍ୟୁ ଘଟିଥିବା ଦେଖବାକୁ ମିଳିଥିଲା । ଗୋ ଚାଲାଣ ହେଉଥିବା ସାତୋଟି ପିକଅପ ଭ୍ୟାନ ଓଡ଼ି-୦୪ଡ଼ି୪୦୧୯, ଓଡ଼ି-୦୪କେ-୪୪୧୧, ଓଡ଼ି-୨୨ଜେ-୩୮୦୬, ଓଡ଼ି୨୨ଏ-୫୮୩୯, ଓଆର-୦୪ଏଫ- ୯୩୯୬, ଓଆର-୦୧ଏଚ୭୪୦୪ ଏବଂ ଓଆର-୦୧ଏଫ- ୩୯୮୬କୁ ବଜାର ମଝିରେ ଲୋକେ ଭଙ୍ଗାରୁଜା କରିଥିଲେ । ଏଥି ମଧ୍ୟରୁ ଗୋଟିଏ ଗାଡ଼ିକୁ ଜାଳି ଦେଇଥିଲେ । ଧାମନଗରରୁ ଦମକଳ ଆସି ନିଆଁକୁ ଲିଭାଇଥିଲା । ଧୂଷୁରୀ ପୋଲିସ ଘଟଣା ସ୍ଥଳରେ ପହଂଚିଥିଲେ ମଧ୍ୟ ଉତ୍ୟକ୍ତ ଲୋକଙ୍କ କବଳରୁ ଗାଡ଼ିକୁ ରକ୍ଷା କରିପାରିନଥିଲା । ଖବର ଜଣା ପଡ଼ିବା ପରେ ସକାଳୁ ଅସୁରାଳି ବଜାର ଅଂଚଳ ଲୋକାରଣ୍ୟ ହୋଇ ଯାଇଥିଲା । ପୋଲିସର ନିଷ୍କ୍ରିୟିତା ଯୋଗୁଁ ବେଆଇନ ଗୋ ଚାଲାଣ ବୃଦ୍ଧି ପାଉଥିବା ଅଭିଯୋଗ କରି ଶହଶହ ଲୋକ ଏଠାରେ ରାସ୍ତା ଉପରେ ବସି ରହି ଭଦ୍ରକ-ଆରଡ଼ି ସଡ଼କକୁ ଅବରୋଧ କରି ଦେଇଥିଲେ । ସ୍ଥିତି କ୍ରମଶଃ ବିଗୁଡ଼ୁଥିବାରୁ ଘଟଣା ସ୍ଥଳରେ ୨ ପ୍ଳାଟୁନ୍ ପୋଲିସ ଫୋର୍ସ ମୁତୟନ କରାଯାଇଥିଲା । ଧାମନଗର ଉପଖଣ୍ଡ ପୋଲିସ ଅଧିକାରୀ ୍ମନୋରଂଜନ ସାମଲ, ମାଜିଷ୍ଟ୍ରେଟ ଭାବେ ଭଣ୍ଡାରିପୋଖରୀ ତହସିଲଦାରପ୍ରଣୟ କୁମାର ଜେନା, ଧୂଷୁରୀ ଆଇଆଇସି ରାମ କୁମାର ମୁର୍ମୁ, ଧାମନଗର ଆଇଆଇସି ବନ୍ଦନା ପାତ୍ର,ଏସଆଇ ଗୟାଧର ବେହେରା ପ୍ରମୁଖ ଘଟଣା ସ୍ଥଳରେ ଉପସ୍ଥିତ ରହି ମୁର୍ମୁଷ ଅବସ୍ଥାରେ ଉଦ୍ଧାର ହୋଇ ପଡ଼ି ରହିଥିବା ଗୋରୁ ମାନଙ୍କର ଚିକିତ୍ସା ସ୍ଥାନୀୟ ଲୋକଙ୍କ ସହାୟତାରେ କରାଇଥିଲେ । ଦୀର୍ଘ ସମୟର ଉତେଜନା ଏବଂ ରାସ୍ତା ଅବରୋଧ ହେତୁ ଗାଡ଼ି ଚଳାଚଳ ବନ୍ଦ ହୋଇ ଯାଇଥିଲା । ସ୍ଥାନୀୟ ବଣିକ ସଂଘର କର୍ମକର୍ତା, ଜନ ପ୍ରତିନିଧିଙ୍କ ଉପସ୍ଥିତିରେ ପୋଲିସ ଓ ପ୍ରଶାସନିକ ଅଧିକାରୀମାନେ ଉତ୍ୟକ୍ତ ଲୋକଙ୍କ ସହ ଆଲୋଚନା କରି ବେଆଇନ ଗୋ ଚାଲାଣକୁ ବନ୍ଦ କରିବା ଦିଗରେ ଦୃଢ ପଦକ୍ଷେପ ନେବାର ପ୍ରତିଶୃତି ଦେବା ପରେ ରବିବାର ପୂର୍ବାହ୍ନ ୧୧ ବେଳେ ରାସ୍ତାରୋକ ପ୍ରତ୍ୟାହୃତ ହୋଇଥିଲା ।